Natalie Netzler
2025: E whai ana a Tākuta Natalie Netzler o Waipapa Taumata Rau ki te tūhura i ngā haumanu patu huaketo mā te whakakotahi mai i ngā pūkenga iwi taketake ki roto i te ao rongoā mā te mātai huaketo tino hou rawa
Āhua 300 ngā huaketo e mōhiotia ana kei te poke i te tangata, engari he tino iti noa ngā huaketo ka taea te whakamaimoa, ka mutu ka taea ngā huaketo te whakatipu ātete ki ēnei patu-huaketo me ngā rongoā āraimate puiaki. Ko te mutunga atu ka noho whakaraerae te tini piriona tāngata ki ngā mate huaketo puta noa i te ao, ā, kāore he paku aha hei āwhina, ko te tiaki noa i ngā tohumate. Kei te tino hiahia te ao i ngā maimoatanga patu-huaketo haumaru, whai take, wātea ki te tokomaha.
Kua whakawhiwhia a Tākuta Natalie Netzler (Ngāti Ruanui, Ngāti Hauā, Hāmoa – Moto’otua, Falealili) ki te Mana Tūānuku hei tuitui haere i ngā tikanga mātai huaketo tino hou rawa me ngā pūkenga iwi taketake hei tautohu i ngā patu-huaketo rerekē mō te whakamaimoa i ngā mate huaketo. Ka mahi tahi me ngā hapori Māori me te Hāmoa, ka whakamātautau a Tākuta Netzler i ngā tīpako tipu rongoā mō ngā tūmomo huaketo, mā te whakamahi i ngā tikanga taumata tiketike nō te mātai huaketo. Ko te whāinga kia whakapai ake i ngā hua hauora mā te tautohu i ngā patu-huaketo rerekē mō ngā mate huaketo kāore he maimoatanga haumanu i whakaaetia – pērā i te karawaka, te mate naenae me te Zika. Ka puta pea i tēnei mahi ngā arawātea atu anō mō te waihanga hua āpiti pērā i ngā hua taioraora, rongoā whaihanga rānei mai ngā rawa hinengaro mō te hanga rongoā patu-huaketo me te tautoko i te tipuranga ōhanga me ngā arawātea mō ngā hoa patui Māori me Te Moananui-a-Kiwa.
He Pouako Matua a Tākuta Natalie Netzler i te Faculty of Medical and Health Sciences i Waipapa Taumata Rau, he Kaiwhakataka hoki o te PC3/BSL3 Facility e whakahaere ana i ngā kaikawe poke i te Physical Containment and BioSafety Taumata 3. Whai muri i te tohu kairangi i roto i te Mātai Awhikiri me te Mātai Koiora Moroiti mai i Te Whare Wānanga o New South Wales, i whakawhiwhia a Natalie ki te New Zealand Association of Scientists’ Cranwell Medal mō te whakawhitiwhiti kōrero pūtaiao me te Tohu Rangahau Aramahi Pūhou o Maurice Wilkins Centre mō te kōrerorero tahi ki te hapori. Kua whakatauiratia e Natalie ōna pūkenga i roto i te whakahaere pakihi, te hangarau koiora, me te kōrerorero tahi ki te hapori, tae atu ki te whakahaere haumaru i ngā moroiti tino mōrearea.
Dr Natalie Netzler in the laboratory (photo supplied)